上一篇介绍过星野渡假村(Tomamu)的客房同餐厅有几正啦，今次就会讲下渡假村有咩玩啦！夏天同冬天的星野渡假村系完全截然不同的风景，无论睇定玩都好唔一样，今次少女系夏天去既，而其中一个夏季限定景色就系传说中的云海！呢个景象只在5月中旬至10月上旬有机会睇到，而且需要相当的运气，睇唔睇到完全视乎当日天气状况。
凌晨4点左右就要出发搭缆车上山，山上气温好低，我去个日系6月亦只有1度，大家要准备足够御寒衣物，而缆车终点站都有风褛可以借。上到海拔1296米的云海平台，只要等到雾气消散，就会渐渐见到云海。如果运气好就会见到以下呢个壮观云海。
但我去个日只见到远远的云河，同想像中的云海相差甚远。人生有好多风景都系可遇不可求既，虽然冇云海，但其实山上风景都好靓，上黎睇云层变化都值得。
呢个系2015年先建成的云海展望台，凌空兴建的设计，云海出现个阵行出去就会有企系云上的感觉，希望你地去的时候可以见到真正的壮观云海，一定好靓架！
另外，云海平台上有间卖明信片的店，系呢度寄明信片仲唔驶贴邮票添！我就寄左张云海明信片俾自己啦，一个星期左右就收到！仲有个露天咖啡厅，可以一边饮杯热饮温暖下，一边欣赏云海景色。
另一个夏季限定的活动就系好刺激的漂流啦！漂流地点系离渡假村约半个钟车程的鹉川，报名之后会有教练车你去换衫同带你去玩。少女漂流的故事系好惊险的，因为途中架艇撞石反左（好似铁达尼撞山呀Jack），我！跌！左！落！水！而我系唔识游水既，完完全全唔识个只。水流太急乜都捉唔住，水浸过头个下我以为自己要死。（小姐你有救生衣架其实）系喇，credit俾返救生衣，几秒之后就浮返上黎。但都劲惊恐，因为知道再唔上返架艇随时会被水冲去。死揽住只艇对抗水流，等教练救我，弱弱地叫了一句help，教练终于救返我。呼～之后继续系漫长的漂流，无限个旋涡，水花四溅100次之后终于玩完。全程大概漂流左40分钟。
大家睇相应该都会感受到个种惊涛骇浪，我自己睇返都有少少打冷阵......不过都真系一个难忘经历，喜爱刺激的朋友应该会好钟意玩。
玩完刺激的，系时候静静参观渡假村里一个庄严的景点，就系由世界级建筑师安藤忠雄设计的水之教堂。教堂采用与自然共生的概念，由「水、光、绿、风」等自然元素结合，成为一座同优美大自然融为一体的浪漫教堂。十字架建在平静湖泊上，如在水中央。教堂被青葱树林包围，一呼一吸都是纯粹的大自然气息。水之教堂的气氛跟一般结婚教堂的感觉很不同，有种沈实的浪漫。教堂每天一早一晚各有一段开放时间，我早晚也去过，建议大家还是早上去比较好，晚上感觉有点......自己看相吧。
台湾歌手梁静茹曾经在水之教堂拍MV，首歌叫崇拜，大家可以睇睇MV里的教堂。LINK
同水有关的仲有永渡假村内一个室内人造浪泳池叫微笑海滩 Mina Mina Beach。佢系全日本最大室内暖水池，全年水温保持28度，就算出面落雨不怕落雪也不怕，冬天夏天都玩得。最正系泳池每隔半个钟就有人造海浪，好似我一样唔识游水就可以租水泡玩，呢度有好多唔同种类的水泡同浮床俾大家租借，好贴心。我揽住个水泡在泳池浮浮沈沈左成个钟唔舍得走。
而泳池周边有好多小玩意，有按摩池、儿童池、弹床、仲有教你整雪糕的workshop，我就试左整啦！味道唔错架，想唔想试下？
泳池隔离仲有一个露天温泉叫木林之汤Kirin-no Yu，入面唔俾影相，但景色系非常非常靓，所以我特登从官网揾左张相俾大家睇。呢个温泉系望住森林浸架！冬天就望住雪景，好正呀！！
除左以上特别推介的景点同活动，星野渡假村仲有好多好多野玩架，哥尔夫球、热汽球、独木舟、踩单车、做SPA等等，动静皆宜。而冬天就会有滑雪场，又有一个名为爱丝冰城的Ice Village，有好多用冰整出黎的设施包括冰之酒吧、冰之咖啡厅、冰之教堂、冰之饭店等等，仲有溜冰场！所以无论咩季节黎，节目都一样丰富，有排玩！今次夏天黎到渡假村，少女最深刻系呢度成个环境都被森林包围，间中随意走出室外散散步，放眼都系无尽的树木同山景，气氛超级写意，心情好放松。到冬天个时，今次见到的青葱森林、翠绿山景将会全部变成白茫茫的雪景，想像下都觉得好浪漫呀，非常希望冬天可以再访星野渡假村，感受北海道的另一面！
北海道星野渡假村 4 日 2 夜套票 (每位$4,888+)
详情：PAM Holidays 北海道星野渡假村套票