亚洲地区有好多欧陆式小村落，以欧洲唔同国家做设计蓝本，令大家唔驶用好多钱搭飞机去好远已经可以感受到欧洲气氛。除左之前介绍过的小瑞士村外，位于首尔近郊，同样系京畿道范围内的坡州亦有另一个仿欧洲童话小镇的景点，普罗旺斯村，一个充满南法风情的小镇。大热韩剧《来自星星的你》都系呢度拍架！都敏俊si～（我已经唔钟意你了，我新宠系刘时镇大尉）
仿欧洲的景点通常都有一个特点，就系好多好多七彩缤纷的屋仔，令你感觉置身童话世界里，成个感觉都好欢欣好梦幻，似乎欧洲同童话系画上等号。普罗旺斯村都唔例外，每个角落都系少女影艺文青相的好地方。七彩屋仔好靓，周边装饰都好靓，少女们一定会好钟意呢度。
除左欧陆建筑之外，普罗旺斯村充满悠闲写意的气氛，因为周围种满花草，环境又空旷，比起首尔市中心，呢度真系一个宁静的世外桃源。
普罗旺斯村有唔少商店同餐厅，有各式各样的小店，又有卖家居用品、杂货的大店，都几多野可以睇。影下相行下舖头，可以消磨到两、三个钟左右。
首尔市中心出发，搭地铁去到合井站2号出口，转坐2200号巴士，大约40分钟就到「城东十字路口」站。落车见到对面有座古色古香的建筑物，沿左边的斜路上山，途中会见到一架巴士cafe，大约行10分钟见到粉红色屋仔就到普罗旺斯村啦！
而普罗旺斯村附近仲有另一个景点叫Heyri文化艺术村，由普罗旺斯村行大约20分钟就到，我都有去逛逛。Heyri文化艺术村好大，好多个入口，里面有各类型博物馆、体验馆、画廊、书店同cafe，系一个真。文青地方。呢度的建筑物造型都几特别，本身已经系一件艺术品啦，而且几乎冇商店，真系一个纯料文化艺术体验的景点，感觉毫不商业。艺术村唔收入场费，不过入博物馆就要收费，每间收费唔同，有韩国近现代史博物馆、电影博物馆、玩具博物馆、3D艺术馆等等。好似入场可以买唔同的套票，包左唔同博物馆的入场费，大家可以根据喜好买套票。
Heyri文化艺术村维持着与大自然共存的理念，所有建筑物唔可以起超过三层楼以上，整个环境都系好舒适空旷，天空都特别广阔。呢度都系好多韩剧的取景地，包括《秘密花园》、《绅士的品格》、《花样男子》等等，韩剧迷会好有亲切感。
特别想介绍艺术村里一间餐厅，叫ADAMAS253，我系俾佢外型吸引左入去既，设计好特别，而里面楼底高，空间感好重，有d艺术装饰品，窗外景色一片和谐，有格调得黎又不失写意气氛。餐厅以西餐为主，质素唔错，少少贵，主菜平均过100蚊。后来我先知《来自星星的你》都曾经黎过呢间餐厅拍，究竟全首尔有几多同都敏俊si有关的景点？
如果会睇下博物馆的话，文化艺术村可以行好耐架，加埋普罗旺斯村就已经可以行大半日。其实附近都仲有多一个景点叫坡州英语村，又系有好多仿欧洲建筑，但就唔系走童话风，而系提供学英文的体验环境，令人可以在一个似外国的环境学外语。但谁要去韩国学英文了......我就唔太有兴趣啦，冇去到。另外2200号巴士会途经坡州outlet，我有去呀，但就觉得冇咩野睇啦，零收获。不过我成日觉得去outlet买唔买到野好讲运气，祝你好运噜。
普罗旺斯村
地址：京畿道坡州市炭县面城洞里82-1
交通：地铁合井站2号出口，转坐2200号巴士于城东十字路口站落车
开放时间：星期一至日10:00-22:00
网址：http://www.provence.co.kr
Heyri文化艺术村
地址：京畿道坡州市炭县面Heyri村街82-105
交通：地铁合井站2号出口，转坐2200号巴士于Heyri站落车
开放时间：逢星期一不开放，每间博物馆开放时间不一样
网址：https://heyri.net/