台东最吸引的风景一定系海景，面向太平洋的台东，由市中心出发沿住海岸玩，沿途有好多可以停靠的景点，虽然都系睇海睇海，但每个景点都有独特之处，最好可以自驾游，或者包车，因为台东交通唔方便，公车班次好疏落。
先睇睇呢幅地图，路线由最远的三仙台开始玩返转头，接住系成功镇，再去杉原海水浴场，最后去埋小野柳就返市中心。如果想一日去晒都可以，好早出发，黄昏过后再返市中心。我当时系超悠闲mode ，所以分开两日去。（地图图片来源：东部海岸国家风景区旅游服务网）
第一站系三仙台，由珊瑚礁海岸构成，有好多自然奇观，包括受风化同海水侵蚀而形成好多造型奇特的岩石、海蚀地形，对地质生态有兴趣的可以黎睇下。三仙台有个地标，就系一个波浪型的跨海步桥，连接对面的离岸小岛，可以行上去过桥到对面的小岛欣赏海景，但好可惜我去个日条桥维修中，所以就冇得上去。三仙头个石滩好靓，有好多唔同颜色、形状的石头，都可以落水玩，水好清好干净。听讲呢度日出景色都好靓，仲系2015年1月1号台湾迎接第一个日出的地方添。
离开三仙台，去到附近位于成功镇三仙社区一个滨海小部落，叫比西里岸。呢度有个几米园区，周围有好多几米的壁画同公仔，好可爱啊！
另外以前住比西里岸的阿美族人养羊维生，所以呢度都有好多大大小小的木雕羊。呢度感觉好有童真，海岸风景又靓，我最钟意就系呢度啦。
第三站去到杉原海水浴场，呢个地方特别之处系可以买面包落水喂鱼，水清沙幼，可以清楚见到晒d鱼，不过呢喂鱼的人都多，所以又多左少少垃圾，但比起香港都已经系好干净......个人觉得比较其他地方，杉原海水浴场可去可唔去。
最后一站系小野柳，台北有个地方叫野柳，同呢度好相似，所以呢度就叫小野柳啦。小野柳主要睇海岸边唔同类型的岩石，受到地质构造变动，加埋海浪长年累月侵蚀冲刷，就形成左好多状奇特的岩石。石头凹凹凸凸，有时浪大又冲左海水上黎，所以行在石头上好滑，有少少危险，要小心啊。
再次强调台东的海岸好靓，海水颜色有层次，又清又干净，就算唔去晒以上的地方，都一定要去海边relax下！