初踏福冈，计划行程的时候发现其实唔多野玩，市区好细，博多同天神系购物区，钟意跑景点可以去太宰府、福冈塔、门司港、柳川。但我对郊外小岛情有独钟，所以除左行左一阵购物区外，其他以上景点一概冇去，反而去左一个旅游书都好少介绍的岛仔 - 能古岛，享受悠闲小岛风情。
能古岛算系一个同市区好接近的岛仔，搭地铁去到姪浜站，
北门出口搭98号巴士约15分钟去到姪浜渡船口（即系码头），
就可以用自动售票机买飞搭船去能古岛啦，来回460yen。
船期大约一个钟一班，有时半个钟。呢架船有名，叫花之能古，单车同私家车都可以上船。船上有室内都有露天位，欣赏下海景吹下海风，大约10分钟就到喇！
一落船就见到有架接驳巴士，佢就系去今次目的地- Island park的巴士啦。由码头去到公园大约15分钟。公园入场费1000yen，多数人黎能古岛都系为呢个公园而黎，睇张门票就知呢个公园最大卖点系咩啦。
冇错，Island Park最吸引游客就系呢一片花海啦！有花又有海景，系名符其实的花海呀！！！系咪好靓呀？唔同季节都会有唔同花睇，今次我10月中黎，盛开的就系大波斯菊，有紫色、粉红色、白色，成个画面都好粉嫩好靓呀！春天会有樱花同油菜花、夏天有杜鹃花同向日葵、冬天有水仙同山茶花，大家可以拣唔同季节黎呀。
Island Park成个环境都系一个超级写意的花园，除左花海之外周围都种左好多树同唔同的花，有一大片草地，又可以见到海，黎野餐都唔错架。
而我钟意呢度仲因为呢度有好多兔仔呀！！！Island Park养左超过30只兔仔，只要俾100yen买个扭蛋兔粮，就可以同兔仔近距离接触，喂饲佢地啦。佢地超级超级可爱呀，只要你拎住兔粮，就会成群冲埋黎食，见到佢地真系超治愈架！！！好得意呀！！！我个心完全融化。哈哈。话说我以前屋企都有养兔仔，系全白色个种，好得意架佢，所以我系超级钟意兔子呢种动物！
而呢度有一d系比较冷漠既，佢地会成群结队默默食草......但净系见到佢地发呆个样已经觉得好可爱啦！
兔仔附近有山羊区，都可以买草喂饲，但我对你地冇兴趣啦，bye！（明明去清境个阵都捉住d羊唔放，而家有兔仔就废事理d羊......）
Island Park仲有几间特色小店，卖下手信、艺术品，有间cafe，仲可以学烧陶瓷添呀！另外仲有d小玩意，咩滑草呀、踩高桥个d，要另外收费。
公园唔大，行下影下相hea下大约两个几钟就行完，可以在入口搭返头先架接驳巴士出返码头搭船。走个时见到好靓好靓的日落！！！个天橙色架，好正！！！好有feel der！
落船发现有巴士直接返博多/天神，可以唔驶再转地铁。其实黎都有巴士直接黎，不过我懒得揾边度上车，就地铁再转巴士。回程选择一程巴士会比较简单。
如果想远离市区享受下郊外宁静，不妨黎一趟能古岛啊！
交通详情及时间表
