秋天去韩国除左赏红叶同银杏，仲有唔可以错过的梦幻芒草景色！香港睇芒草最出名应该系大东山，但据说上山之路难度有4粒星，并唔系普通弱质纤纤的少女（即系我）可以随意挑战的。首尔就唔同啦，距离市区不远的天空公园每年10月都有一大片盛开芒草，虽然都系位于山上，不过上山之路一点都不难行，懒到尽头甚至可以搭接驳车上山，芒草得来全不费功夫呀！系咪正先？
首先搭地铁来到世界杯竞技场站1号出口，绕过个竞技场行10分钟左右，穿过一个露天停车场，就会去到一条两旁种满花的天桥，前面见到有条装饰得靓靓的木天梯！冇错，行上呢条木天梯就会去到天空公园架啦！天梯有约300级，老老实实行上去都几辛苦下......不过又唔可以以我作准，因为我本身体能就极差......我见隔离d阿猪妈好似行得几轻松......仲有气力撞开d阻住佢地既人......哼。我觉得《尸杀列车》由韩国人拍真系好适合，佢地个个都孔武有力，撞人又不遗余力，我在韩国每日都只少俾人撞一次，相信黎过韩国的人都会好明白。
但我头先都讲左啦，如果懒到尽头，天梯旁边贴心为你准备左接驳车上山，类似高尔夫球车，盛惠2000won一程，来回3000won。但我两程都系行天梯架！上去个程谂住一场黎到挑战下麻，虽然中途有点后悔，不过落山个程又觉得甘辛苦都上到黎啦，落去轻松d既，咪行返落去啰。（说到底我还是个有一点点毅力的家伙呀～）
一路行木天梯一路望返去山下会见到好靓的首尔城市风景，入秋时份山下的树有齐红黄绿3色，另外仲会见到汉江。
行完天梯以为到左？错啦，仲要行多一段仔斜路，少少斜啦，行几分钟就会见到一旧石，天空公园到着！免费入场的。
基本上一行入去个公园，就已经见到无尽芒草，你绝对会俾眼前芒草吓亲，因为系多到难以想像！！！好正呀！！！今次系我第一次睇芒草，就可以睇到甘震撼的，好开心！公园超大，有源源不绝的芒草。我以为芒草好矮，但原来生得好高下，同人差唔多高，行在中间，有可能会迷路，因为周围都系芒草，周围都差唔多样。
我帮大家闻过，芒草系冇味的。
天空公园冇咩特别设施，入口附近有一间类似士多的小店，路中间有d亭俾大家坐下训下，仲有一个中央展望台，一定要上去，因为可以从高处睇到一望无际的芒草，好靓架。
每年10月天空公园都会有芒草庆典，内容不清楚，但会特别开放公园至夜晚10点，可以睇夜景！每年10月至11月就系芒草盛开的月份，在芒草庆典举行的日子前后时期来就最好。对了，入口处仲有少量波斯菊。（很跳tone）
世界杯竞技场站1号出口附近除左天空公园，其实仲有几个公园的！走的时候经过一个小小的和平公园，有个小小的湖，刚巧天气很好，湖水有天空倒影，超！级！靓！是韩版天空之镜啊～想起来首尔其实好多公园，而且都好近市区，好羡慕啊，游走首尔的公园身心好舒畅，花季景色更加优美，这也是我很喜欢首尔的其中一个原因。
天空公园
地址：首尔特别市麻浦区天空公园路95 (上岩洞)
交通：地铁世界杯竞技场站1号出口行30分钟（连埋行天梯时间）