墨尔本远离市区有好多景点，唔识揸车的话可以参加一日团，选择好多，其中一个极受欢迎的系大洋路（Great Ocean Road）行程，因为有十二门徒石奇观，都算系澳洲一个必去景点。大洋路系一条海岸公路，沿路都系超级靓的海岸风景，除左十二门徒石，一般行程都仲会包多几个附近的景点。市区唐人街个边有好多旅行社，可以今日报名听日出发，我就随意拣左两个一日团，一个系大洋路，另一个系去睇企鹅回巢的。今次就介绍大洋路的行程先。
行程第一站就系十二门徒石（The Twelve Apostles）啦，离墨尔本市区都几远，差唔多3个钟车程先到！落左车见到真身，哗真系好壮观！我去个日天气又好好，更加靓！海水又绿又蓝，无边无际！眼前的石柱系经过千年万年才形成的，真的好神奇。但数黎数去都唔够12个石柱，原来因为长年累月受到海水侵蚀，而家净返7个咋。（但据说其实最初都唔系12个，好似系9个）而侵蚀系唔会完，唔知几时会再少一个，大家要趁早黎睇呀。大家仲可以拣坐直升机从高空欣赏，冇记错系大约澳币$100，即系港币$600，唔算贵呀，但我冇坐，就甘睇都好靓啦。但想提提大家呢度超级大风～～
然后下一站系附近的六合谷（Loch Ard Gorge），呢个系由海水冲刷出来的峡谷，有人系度晒太阳，落水玩都可以，大家可以近距离观赏峡谷的岩石，我都觉得呢度好靓好靓。但同样，都系好大风......
之后就去左一个名为阿波罗湾（Apllo Bay）的海边小镇食lunch，有几间餐厅可以拣，我拣左食fish & chips，又几好食，不过唔系重点，重点系食完即冲出去餐厅外个海滩hea。我觉得澳洲最正就系海景，有无数个海滩俾你好好hea，澳洲充满无可取代的悠闲气氛呀！！！
食完之后就已经起程返市中心，感觉上唔系去左好多地方，但其实连埋车程已经11个钟啦。大约系朝早7点出发，6点返到市中心。不过坦白讲，我唔特别推介呢个团，因为我觉得个导游麻麻地，佢系一个讲普通话的阿叔，成程车佢都好似自己同自己讲野，劲细声，完全听唔到佢讲咩。而且个团超多人，40几人，太多啦！所以大家报团可以揾多d数据再决定。但大洋路系绝对值得去架，可以自驾游就最好！